健身 9

放工就搭車去旺角，點解旺角1年365日都咁鬼多人？？由火車站好艱辛咁行到去目的地，今日約左教練7點半，我仲有時間買10蚊4包食添，食完就去換衫，見教練之前仲可以跑五分鐘步。夠鐘我就去搵佢，頭兩部機都係玩腳，佢加到45磅，初初又話玩體重嘅一半，以家足足係我嘅體重，不過我都可以完成。

今日好多大隻佬玩，所以差不多每部機都有人玩，佢想玩嘅都比人玩左，所以玩左背部嘅另一個機，初初玩一格之後佢見到我單手拎起所以加到兩格，不過兩格我真係唔得，玩完尼個剛剛佢想我玩嘅機無人玩佢幫我霸住，我發覺我以家話重玩唔到佢都唔再信我，真係慘。

唔知點解竟然玩瑜伽個大波波，佢叫我企係一個半圓上面睇下我平唔平衡到，跟住就攞住個大波波，玩左幾下又跌，之後維持多10下又玩完啦。

玩完晒之後覺得真係有D腳軟，因為我上過咁多堂除左第二堂之外，最軟都係今次啦，我都唔明點解我玩極都好似唔痛咁？？唔通係我嘅脂肪勁？？

我玩完就到Pong玩啦，佢今日腳痛都玩呀，因為如果要改時間要係上堂前二十四小時改架，如果唔係就會無左一堂啦，一堂好貴架