27號大食會

Pong請左假9點幾起身食早餐, 11點幾出門口12點20分去做GYM, 可能少做感覺好辛苦, 做完運動去左行玩具店, 比我買左個公仔, 好得意架

聖誕夜

聖誕夜無約人6點幾同Pong出尖沙咀行街街, 今年真係無咩燈飾睇

平安夜

24號我公司搞大食會, 返到公司搞掂自己野, 11點幾就幫手搞大食會野, 食之前影返張先

死啦!!我好似肥左好多

小學同學餐聚

今日放工出旺角, 約左四位舊同學係旺角食飯, 旺角真係好多人要好辛苦先行到去朗豪坊, 7點鐘去到風月堂等位, 嘩!!要等成20張, 咁我地就走左去女人街裡面其中一間餐廳食啦, 一路食一路傾, 雖然我地唔係成日見, 又有各有各生活, 但係我地係有講唔完嘅話題囉, 我終於明白三個女人一個墟, 而且我地係五個女人喎, 最噪就係我地張枱呀

就快聖誕嘅星期六

昨日星期六放工去左中環買聖誕禮物比Pong, 買完就坐地鐵去鰂魚涌轉將軍澳線返屋企, 去到銅鑼灣唔知點解會神推鬼拱咁落左車, 個度真係超多人, 行左一陣都無頂唔順坐巴士返屋企, 去到apm買護膚品, 見到我之前想買嘅香水tommy girl以家禮品裝$330送一枝沖涼, 咁就買左返屋企啦

農曆新年假

昨日已經出左通告啦, 我地公司由年廿九放到初七, 1月14號annual dinner不過今次唔大搞啦, 只係我地同埋d伙計一齊食, 十幾圍到啦, 今次真係放足一個禮拜呀, 真係有d怕放咁耐到要返工嘅時候會唔習慣添

最衰Pong又無得放咁耐啦

幾抵喎

前幾日上網訂左條麵包超人褲仔比晉晉, 其實我覺得應該係大左少少架, 不過太得意啦, 忍唔住手訂左

聖誕咭

今年我第一年參加華仔天地下晝收信時見到佢地嘅地址寄黎嘅, 原來係張聖誕咭係好靚嘅一張聖誕咭, 有佢設計嘅兩隻公仔, 做到好似立體咁, 真係好開心

好過無

昨日放工去到旺角Pong又未到, 咁我就去馬會對下兩張六合彩, 結果兩張都中, 不過都係幾廿蚊

合作

今日朝早返黎快快手用自己嘅野, 到10點幾5個女仔就開始佈置公司, 個d飾物已經用左好幾年啦

games友飯聚

昨晚係公司hea到6點9先放工, 之後坐車去上水等Pong同佢d同事, 一行9人去深圳食小肥羊, 有三對+1個都係一齊玩我玩緊嘅online game嘅同事, 其如兩個就無啦, 好幾個月都無去打邊爐啦, 唔知點解個湯底無以前咁濃同咁辣

笑咩呀

剛剛收到姐姐個e貓, 我就急不及待要同大家分享下...

白行一趟

昨日放工Pong要返學, 咁我就一個人出旺墮角, 去電腦中心幫Pong攞個藍芽去維修, 放低左之後去食左串魚蛋, 食飽就去做運動, 攞埋毛巾去到更衣室放低d野, 先發覺唔記得帶鎖匙, locker裡面有對波鞋, 如果對波鞋唔係locker裡面我買個鎖就可以換衫做運動, 結果還返條毛巾, 之後就坐小巴返屋企

唉!!!想做都無得做

會再試

星期六Pong放工去左旺角, 係先達會合, 之後去左買薯條食, 勁多人排隊, 比完錢仲要排隊攞薯條, 我同Pong一人一個

壞消息

前幾日聽我公司嘅總經理講話會炒人, 尼個消息係無咩人知, 佢仲同我講話近年尾先咁做, 佢都覺得好煩, 其實我聽到個心都好唔安樂, 好唔知點咁, 咁又係公司做完一個project, 又無新嘅, 要咁多人黎做咩喎

四人行 - 濕地公園

昨日星期日7點半我就起身擦牙, 之後叫醒Pong同佢爸媽去飲茶, 可能星期六做左負離子, 要就住就住咁瞓, 所以咪一早起左身, 換完衫8點幾去飲茶, 9點幾等巴士入天水圍, 咁大個女好似入左兩次天水圍咋, 仲要係7-8年前添, 行左分鐘終於見到個牌啦, 而且仲好曬添呀

就快三個月啦

星期四放工無野做, Pong又要去打籃球, 所以我打比媽媽話返去食飯, 好掛住佢呀, 差唔多成個月無見啦, 媽媽要煮飯, 梗係做阿姨嘅陪你玩啦, 塊面爆晒拆紅晒, 抱左佢一陣, 佢嘔左少少奶出黎, 原來我件衫都有, 放低佢係張床度, 我掛住照相無同佢傾計就係咁噪, 之後我就同佢講野, 佢笑得好搞笑, 媽媽話佢日日都係咁, 原來佢蝦人抱, 唔知點解好鐘意聽佢喊, 佢嘅喊聲好得意

同事聚會

昨日放工幾左幾位同事去唱K, BOOK左7點半, 咁我地出到尖咀未夠鐘陪另一個同事去睇鞋, 7點3行去美麗華樓下嘅Red box唱k, 個度d食物就麻麻地啦, 都無咩款揀嘅

黑仔王是你

Pong尼幾個月又開始同佢嘅中學同學去打籃球, 初時打成日就整親, 試過整到腳指公爆晒甲腫晒, 好恐怖, 最勁一次眼鏡都斷開兩邊, 之後佢就醒目帶con打, 但周不時都會扭傷

真係未去過

星期六1點放工係屋企樓下食雲吞麵, 返到屋企就用Pong部notebook打機, 由2點幾打到5點幾, 之後瞓到7點起身食飯, 食飽飯我就無得打啦, 因為比Pong打, 佢打到10點熄左機, 11點我地落左樓下嘅網吧, 我真係第一次去咋, $20 3個鐘, 係網吧打機都幾好, 因為唔會lag機同hold機, 但就噪左d囉, 坐我隔離嘅男仔, 開到個喇叭鬼咁大聲, 打到2點45分我地就走啦, 沖埋涼3點幾瞓覺啦

電腦壞左

唉!!!好慘呀, 前幾下晝部電腦都好地地, 只不過要開兩次先開到機, 之後到夜晚連開機都開唔到啦, 昨日Pong弟弟睇過, 因為部電腦係佢嘅, 而且佢係I.T人, 原來燒左個火牛, 所以尼排都要用住Pong部notebook打機, 不過又打唔得耐, 因為佢都要打嘛, 唉!!!真係黑仔啦

北上晚餐

好早之前已經約左昨晚返大陸食飯, 真係好耐無返啦, 6點幾放工諗住坐火車去上水Pong黎接我, 入左閘之後先記得睇戲個日攞左張身份證出黎唔記得放返入銀包, 唔怪得知朝早出門口嘅時候就覺得好似有野未攞, 但又諗唔起係咩, 感覺怪怪地咁啦

勁搞笑

昨日放工返屋企, 9點幾沖完涼去APM吉野家, Pong又食個火鍋, 佢真係好好彩係最後一個, 食飽野行到11點半就係戲院出面坐等入場

求求其其又一餐

昨日下晝返到公司成個tray都係野, 不過我用左極速3個鐘頭時間擺平佢, 之後梗係上網啦, 唔知點解見到個tray有d文件個心就會好唔舒服, 一定要做完為止

唔知醒

昨晚Pong爸媽返左大陸, 我地去左吉野家買外賣返屋企食, 食飽飽打機, 打到8點幾DIY面膜苦瓜+綠豆粉+益力多, 我都係第一次整, 整完之後沖涼塊面d粒粒謝左, 不過就乾左d, 整完野再打機, 12點幾瞓覺

秋天都咁熱嘅

星期六返左青衣探晉晉, 3點幾返到去姐姐畏緊奶, 畏完奶佢就瞓左啦, 咁我就無無聊聊玩電腦, 4點幾姐夫黎左同姐姐出街食野抱左晉晉出去, 佢地返黎都仲瞓緊, 6點幾姐姐同姐夫要出街唔帶晉晉去, 直到7點幾我走之前佢都仲瞓緊, 唉!!!搞到我一張相都影唔到呀

20081022

昨日星期三無去做運動返屋企探晉晉, 係葵芳幫姐姐買金銀花, 返到屋企姐姐話我買錯左, 入到屋攞完野比姐姐梗係去洗手同晉晉玩啦, 點解佢瞓到成日死豬咁, 佢瞓覺嘅時候都係影相嘅好時候, 不過媽媽爸爸話唔好喎, 話之前就無所謂, 以家大左就唔好怕會攝左個魂喎, 都係d迷信野

蝦餅事件簿

昨日星期一返到公司見到食物兜放左一包印尼炸蝦餅, 直到10點幾我忍唔住口食左兩塊, 真係超好味, Pong媽都炸過我比我地食

唔夠瞓

星期六打機打到1點幾先瞓, 星期日9點半已經起左身, 10點去大快活食早餐, 之後去坐小巴出旺角做gym, 12點玩body combat玩完去沖涼坐車返屋企, 2點返到屋企世伯買左盒壽司比我地食, 食完又係打機, 打到6點幾雖然好眼瞓, 但係怕瞓左夜晚瞓唔到, 所以捱住

笑咪咪

昨日Pong要返學, 佢返學個度係青衣, 咁我就返左屋企食飯探下晉晉, 本來無諗過返青衣, 所以放低左部相機, 無得影晉晉添, 最慘嘅係連手提都無帶呀

一個月14日

星期日bb返媽媽度食飯, 咁我梗係返去啦, 6點幾返到去見到姐夫好努力咁砌緊晉晉張床仔, 因為第時姐姐返工晉晉就會係媽媽湊, 呵呵呵...以後我就會多左返屋企啦

S.L.

昨日起身返工時都覺得個喉嚨好唔舒服, 返到公司就開始流鼻水差唔多成卷廁紙比我用晒, 放左工係條街度就好返好多, 可能吸返D空氣啦, 返到屋企一個人都無, 世伯伯母返左大陸, Pong又要返學, 佢弟弟就未放工, 等到10點幾Pong買粥比我食, 食完就瞓覺

重陽節

昨日係重陽節放假一day, 8點幾就比人噪醒, 8點半同Pong一家出去食早餐, 之後坐小巴去柴灣拜山, 雖然同佢拍左拖3年, 今次我係第一次同佢地去拜山, 同平時返工差唔多時間, 仲辛苦過返工, 因為要行呀

懶惰的一天

昨日星期日, 10幾起身陪Pong落街睇e生, 係呀佢又病左啦, 真係可憐, 落到街勁大雨, 睇完e生係大班買麵包, 食左碗河粉就返屋企啦

20081002

10月2號係我生日, 1號Pong媽爸同我慶祝生日, Pong仲送左份禮物比我添

黃府梓晉滿月之喜

星期日就係阿b嘅滿月, 6點半我就已經到左酒樓, 件禮物都係當日下晝去買

王菀之我來自火星

昨日就係王菀之演唱會嘅第一場, 7點我地就出左門口, 去左大快活食飯, 之後坐車去九龍灣再轉免費巴士, 去到九展好鬼多人, 去廁所都要排幾個字, 原來青山黛瑪都係尼日開演唱會

好彩啫

明天就係阿b嘅滿月啦, 會係荃灣食飯, 今晚係王菀之演唱會嘅第一場, 好彩我買飛買左今日啫, 如果唔係聽日就去唔到食飯...

ON 9

最近我同Pong都鐘意玩尼隻game天龍八部, 初初我地都無玩架, 係Pong d同事個個都玩, 以家搞到我地日日online一齊打怪獸, 越玩越覺得好玩...嘻

Tsing Yi

星期六返左青衣媽媽到攞薑醋比Pong媽媽食, 返到屋企無無聊聊打開個窗影下相

好7煩

我公司有個女仔(H), 佢嘅職位係reception, 話就話係reception但係都會跟project嘅paper works嘅野, 佢做野就越黎越慢, 成日就話好多野做, 但成日就走去唔知邊度吹水

赤柱遊

15號9點鐘起身, 梳洗好就去apm吉野家食早餐, 食飽坐地鐵去中環轉巴士去赤柱

中秋節快樂!!

祝各位中秋節快樂!!!
人月倆團圓!!!
永遠都開開心心!!!

Happy Firday

朝早Pong要去大圍做野, 所以等埋我一齊出門口坐車去大圍

有個同事last day啦, 三點幾買左兩盒西餅比我地食, 同埋影左幾張相

生果週

由上個禮拜開始我公司已經開始收到其他公司送黎嘅生果籃啦, 到現在為止已經有7-8個啦, 而月餅就有三盒, 尼幾日4點幾就開始食生果, 一班同事放低手頭上嘅工作圍埋一齊食, 真係好開心, 好快就放工

正日

今日係Pong嘅生日, 首先我要代佢向所有blogger講聲多謝...嘻嘻, 你地都要快樂過每一天!!!

好唔好彩今日佢要返學, 所以連食餐飯都唔得, 送左份禮物比佢

尼隻小雲係買比我自己嘅

尼對拖鞋都係買比自己嘅...嘻嘻

Pong Pong 生日快樂!!!!

身體健康!!!

酒友飯聚

星期六晚Pong非常之忙碌, 夜晚同佢嘅舊同事又算係好友亦係酒友嘅朋友食飯, 通常同佢地食飯一定有下場...我地去左太子i.t, 叫左半打白威, 一枝黑牌, 個姐姐介紹我地用黑牌溝利賓納, 真係幾好飲喎

出浴

今日短週唔洗返工, 諗住8點半起身, 10點去做GYM, 點知瞓到10點幾, 咁就繼續瞓到11點幾起身換衫坐車去家姐屋企, 12點幾去到, 姐姐坐月其間媽媽照顧佢, 我去到時媽媽準備同BB沖涼, 咁我梗係準備相機啦

Lunch pizza

今日係同事嘅生日, 咁我地尼班好同事就叫外賣pizza返黎食當同佢慶祝

有位同事係旺角買左個好得意嘅蠟燭返黎

啜一啖先

昨晚放工去醫院探家姐, 我見到bb啦, 好可愛, 肥嘟嘟咁, 真係想即刻抱下佢錫佢一啖, 不過都係等佢出院先啦, 佢d皮膚好滑架, 真好似無殼嘅雞蛋咁滑, 但佢個身好多毛架, 好彩係男仔咋

週末

今日1點鐘放工, 一個人係尖咀行街, 又多人又熱, 行到兩點幾, 食埋野3點幾返到屋企, 頂唔順沖返個涼舒服晒, 屋企得我一個人無無聊聊攞住部相機, 唔知影d咩

探姐姐

話說昨日零晨姐姐生左個8磅幾嘅bb, 咁我放工即係買左支葡萄適, 係醫院樓下等埋Pong上去探病, 上到去只可以兩個兩個咁入, 入到去同姐姐傾左一陣就比老豆吹返我地出黎, 因為仲有個朋友排隊等緊探姐姐

我做阿姨啦

12點幾時收到姐夫傳黎嘅SMS, 姐姐係零晨時, 生左個8磅幾嘅肥BB, 不過因為姐姐發燒, 所以要開刀, 但係母子平安, 今晚我會去醫院擔佢

泰八郎

6月個時我訂左幅泰八郎眼鏡, 終於係上個禮拜有得攞啦, 因為係日本手製, 而且製造個人已經老啦, 原來要等3個月架, 等到我頸都長埋啦

飯聚

昨日放工同Pong嘅同事去荃灣食飯, 等左差唔多一個鐘

白痴左添

昨日早9點幾同伯母Pong去kfc食早餐, 食飽陪伯母去吉之島買生果, 買完野行返去勁大雨呀, 剛剛洗好d衫又淋濕晒, 又要過清水洗多次

9號風求的下午茶

昨日7點幾已經起左身, 諗住打去天文台聽下天氣, 打左好多個電話都唔通, 之後就開收音機黎聽, 知道唔洗返工之後就繼續瞓, 瞓到11點幾世伯炒年糕比我地食, 食飽就睇奧運, 2點幾瞓左一陣, 4點幾Pong落街買麥記

暴風雨前夕

放工Pong叫我地新城市搵佢, 同我去連城的申一棧度食片皮鴨

我地用嘅餐具

游泳第二回

昨日天氣非常之焗熱, 所以放工返屋企執野同Pong去游水, 7點幾去到, 可能太耐無練習啦, 所以都唔係好記得, 而且又勁多人喎, 游兩步一係比人整到, 一係就整到人, 游到差唔多8點半就沖身走人

小學同學派對@唱K

星期六剪完頭髮返屋企抖一陣, 8點鐘約左個FD食壽司, 係旺角間間都要等, 之後去左北海道個間, 一路吹水一路食, 食到9點幾行一陣旺角, 就去neway city會合同學仔啦, 本來之前話係校服party架, 之後就無左件事, 不過有兩男一女著到好似校服咁, 仲帶埋中學條呔添, 我地總共有20幾個人, 轉過三間房

多d就好啦

昨日星期六放工出左旺角, 首先梗係去投注站, 一注買10期, 哈哈...又比我中左$320

這晚熱辣辣

昨日Pong叫媽媽打邊爐, 佢仲係citysuper買左支紅酒添, 咁我地放工返到屋企又再落街買餸, 真係好耐無打啦, 一路打就一路睇女排, 真係緊張死呀, 咁都可以比人追到嘅, 激鬼死人啦

游泳第一回

昨晚無去做"占", 放左工返到屋企執野去觀塘泳池游水, 出門口之前食左個包, 原來泳池離屋企都幾遠架

忽然喜歡

昨日星期日10點起身, 同Pong & 伯母落街食早餐, 返到屋企執野11點幾去沙灘, 唔係好多人, 潮退仲好污jo添, 咁鋪好沙灘蓆, 諗住吹水泡, 個水泡新買見到有支好細嘅管, 咁我篤入去吹氣個度, 點知篤"村"左, 如果吹得太脹放氣就會放得快, 不過都用到嘅, 真白痴啦, 咁晒左一陣太陽落水啦, 嘩!!!!d水勁黑囉, 又冷喎, 浸左一陣都上返水啦, 晒到2點幾沖身返屋企

為“你”失眠

昨日星期六短週, 8點幾起左身, 10點玩combat, 11點10分玩zumba, 1點20分玩伸展舞蹈, 連玩3個鐘, 玩完沖完涼, 去左食雲吞麵, 當時真係好攰, 之後坐車去中環再去銅鑼灣行左一陣就返屋企

威E

昨日8號風球11點幾上網訂票睇戲, 咁我地食埋中午飯, 1點45分出門口行去apm, 以為打風應該個個都留係屋企, 點知原來唔係架apm係多人囉, 仲有商店、食市開囉

打到黎啦

昨晚放工一個人去做運動, Pong約左同事食飯, 7點幾上bodycombat, 教練話比我地知已經3號風球啦, 之後玩埋yoga先返屋企, 係屋企樓下好大風, 仲要睇埋台劇1點幾先瞓

有機會再食過

昨日星期日我同Pong瞓到下晝4-5點先起身, hea到7點幾落街食野, 去左佢屋企樓下嘅印尼餐廳食野, 間鋪好細可以容納20人到啦, 我地都要等一陣

小欖BBQ

昨日同Pong嘅同事去小欖BBQ, 5點幾係旺角坐小巴, 去到仲好晒好熱, 坐左一陣我就走左去沙灘行下

杯

上個禮拜去做運動之前去左chocoolate睇下林兔個隻杯, 咩顏色都無晒啦, 得返隻銀色, 不過我都照殺, 件衫太大所以比左Pong著, 隻杯好q大又無杯蓋, 而且都幾重下, 都唔知帶唔帶返工用好

來自火星

星期四係快達網度訂王菀之嘅演唱會, 嘩!!!今日張票寄左黎公司啦, 真係好快喎

我覺得佢唱歌好好聽架, 希望唔會令我失望啦

做左等於無做

今日我開個教練終於都無完假啦, 由7點50分玩BODY PUMP再玩BODY COMBAT, 可能太耐無做, 有D想死嘅感覺

蝙蝠俠

昨晚睇左蝙蝠俠啦, 其實我係想睇香港嘅夜景, Pong就好鬼想睇

放工返到屋企食飯, 睇電視睇到9點50分就行去apm, 今次終於都無買野入去食啦, 我地睇細院都full晒

遊船河

一個月前已經有朋友仔約定Pong去游船河啦, 昨日星期日終於出發啦, 前一晚星期六已經執好野, 7點幾就起身, 仲早過返工, 係小巴站等埋朋友仔就出發, 去到西貢又多人又多狗, d人攞住一個二個水泡, d狗見到其他狗行過吠個不停

一年多

昨晚Pong約左朋友食飯, 所以我去做運動, 我個白痴換左個袋唔記得攞locker鎖匙, 不過好彩我醒目有條後備鎖比佢keep, 咁我就搵佢攞比我, 之後自己行左一陣朗豪坊, 8點去換衫, 9點上bobycombat, 原先個教練放3個禮拜假, 所以昨晚個係第一次上, 簡直係垃圾之中嘅垃圾, 點解我會咁講.........因為佢成日唔記得d動作, 打錯晒囉, 搞到都無咩心機玩

嘩!!真係唔知咁大喎

昨晚放工跟GM車去九龍灣展貿, 有利慶祝魯班先師寶誕, 開60幾圍咁我老闆就要左一圍, 就有餐飯食啦, 去到都係8點鐘都仲未入座, 咁我就同兩個同事周圍行, 咩都無得行悶死人, 8點半GM就打比我叫我地返去要入座啦

扭腸腸

星期四放工又偷懶無做運動, 行左一陣朗豪坊就去pizza hut食野啦, 食左個二人餐, 有一個小食同一個批

惡夢

上個禮拜我係公司發現曱甴, 比我同事打死左佢, 昨日又發玩多一隻啦, 好彩時運高我見唔到

搞到昨晚發左個夢, 夢見好多曱甴飛向我個度, 之後我就扎醒左, 噪醒左Pong佢就開燈比我睇下有無野, 搞左一輪都唔係好瞓得著, 因為仲驚緊

休息夠啦

我都有成個幾禮拜無做gym啦, 因為教combat d教練放晒假, 轉左人所以唔想去玩, 而且又成日落雨, 搞到個人好懶, 唔願郁

功夫熊貓

昨晚又無做運動, 去左九龍塘行街買條連身裙, 返屋企食飯, 睇埋"疑情別戀"就去apm, 買左爆谷同埋腸, 真係好味

套戲係真係好搞笑, 有d位真係笑死我囉, 同埋畫得好靚, 又多多表情, 但個劇情悶左少少, 而且今次又買錯票啦, 因為我隔離又坐左個麻煩友, 又係一路睇戲一路講戲, 仲要好大聲添...

好節目

昨日出到旺角唔係好想做運動, 行左一陣就坐車返觀塘, 去左APM買街頭超人同埋功夫熊貓, 嘻嘻...

風雨不改

前幾日已經講好左星期日去同陽光玩遊戲, 點知天文台話會落雨

7．1假期

嘻嘻...又寫返早幾日前嘅野啦

28號短週唔洗返工, 2點幾坐車出沙田搵Pong之後係中旅社買長隆水上樂園票, 3點幾坐火車去羅湖, 去到羅湖坐和諧號去樟木頭

殺神特工

因為星期六我唔洗返工, 所以睇午夜場, 做完運動9點返到屋企食埋飯差唔多要出門口, Pong仲買左爆谷同咖啡

零食基金

今日Lunch時我同reception講, 不如叫同事夾$$買零食, 咁我公司就分開左兩邊一邊就係做消防野, 而另一邊即係我就係做電嘅野, 咁消防部佢地不嬲都有零食基金嘅, 我尼邊以前都有, 不過自從一個女仔走左之後就無人搞啦

主場

話說上個星期四Pong約左朋友打波, 所以我就一個人去做運動, 做運動之前去買返個希望, 係我中開個間投注站度買

6‧21青衣商會小學同學bbq

6月21係星期六, 又係小學同學聚會, 係C班同D班, 係小欖bbq, 5點幾係旺角坐小巴, 去到差唔多6點, 不過當時都好晒呀, 企係度都出晒汗, 之後仲要對住個爐真係想死, 咁我地燒下野食吹下水又影下相, d人就越黎越多, 有好多人認得個樣, 但已經唔記得個名啦, 唔知再隔多幾年先見會變成點呢

沒有做運動的日子

昨晚無去做運動, 放工就即刻返屋企, 我叫Pong係city super隔離個間餅店度買士多啤梨酥比我食, 超好味...如果我係city super附近返工的話一定肥屎我, 每日都有好美味嘅面包等我食...

天公做美

落左咁多日雨18號個日終於落完啦,

19號仲出埋太陽添

明天星期六要同小學同學BBQ呀,

之前仲怕會落雨, 以家放心晒,

真係多謝太陽伯伯,

不過又唔好太晒喎...嘻嘻,

真係煩呀

"新"變形

星期二個日無去做運動, 去左銅鑼灣買左個袋之後就返屋企, 8點半到達apm, 所以去買票睇戲, 仲可以買平票添

魔幻王國：卡斯柏王子

星期六世伯伯母返左大陸, 等Pong放工返到黎出街食野, 去左吉野家, 9點55分睇魔幻王國, 尼套戲我比90分, 間唔中有d好搞笑, 到最尾又有少少感動喎, 我睇個場有幾個小朋友, 佢地笑得好大聲, 不過好彩唔係坐我隔離啫

頂唔順啦

唔知點解尼排好攰, 每朝起身都好辛苦, 可能因為成日做運動無咩休息過

三日假期

星期六本來長週, 但黑雨嘅關係所以放假, 11點幾轉左黃雨Pong就要返工, 5點幾出沙田搵佢, 食左少少野坐車返青衣, 見到家姐佢肥左好多呀, 終於都開估啦係個仔仔黎嘅, 以家知道買咩衫仔比bb啦

大大大

星期五Pong嘅同事約食飯, 我做跟得女朋友一定會跟埋去啦, 係加太賀食壽司, 記憶中好多年前去過一次

奪寶

剛剛過左個星期日睇晏晝場, 奪寶奇兵之水晶骷髏國(個名好長), 改左唔睇午夜場嘅習慣啦

拜拜

東東今年13歲啦, 佢兩歲嘅時候由朋友屋企湊佢返黎, 佢係我第一隻養嘅狗, 個時媽媽同爸爸都有反對架, 不過佢又帶比我地一家好多歡樂, 由細到大佢都無吠過, 好少病痛, 唔鐘意比人抱, 唔鐘意影相, 每次攞起相機佢都知係同佢影相咁, 一係調頭走, 一係死都唔望過黎, 所以好少佢嘅正面相, 最鐘意就係見到我攞條狗帶好似傻左咁不停咁轉圈, 有人返屋企佢都係不停咁轉圈, 但佢只係會順時針咁轉, 唔識反方向轉, 有時仲會好似轉到飛起咁, 有零食時又會乖乖坐係前面, 叫佢比手手又比, 叫佢sit又即刻sit, 拍一拍張sofa佢就會即刻跳上去, 夜晚瞓覺最鐘意跳上我張床同我一齊瞓, 瞓係我d被上面, 到佢大約9, 10歲時開始跳唔起啦, 連見到有屋企人返都唔會再轉圈啦, 到左近期佢開始睇野唔清楚, 連耳仔都開始唔靈敏叫佢都唔識應

求其大合唱Part II

昨晚睇左林海峰啦, 真係好好睇呀, 雖然有少部份同Part I一樣, 真依然咁好笑, 等到8點半時見到林珊珊同林曉峰, 之後仲見到e神同埋彭羚, 彭羚仲靚過以前呀, 佢坐得太快影唔到佢呀

期待

今日短週放假, 今晚睇林狗啦, 真係好期待呀, 之前聽"晴朗", 佢地話有阿葛做嘉賓, 不過做完之後佢唔舒服入左醫院, 唔知以家好返未呢, 唔知今晚有無佢呢, 定係會有第二個呢, 唔知佢d精品被人買晒未呢, 我一定會買林兔公仔

好想快d到今晚呀

PiZzA

星期一放工之後去左沙田搵Pong, 係佢寫字樓坐左一陣就去食野, 係新城市地下有一間叫shakey's pizza嘅物體, 見到裡面食野d人枱面嘅美食就入左去試下

一肚火

我用左和X寬頻好多年, 因為佢D/L野夠快, 不過隔一個月就會斷線一次, 打去技術支援要聽一大段錄音先有人聽

鐵人

昨日星期日9點半起身換衫出旺角, 玩11點嘅body pump, 出到旺角10點45分啦, 跑去m記買早餐, 之後一路換衫一路食, 玩完一個鐘又玩埋body combat, 好快又一個鐘, 想走之前見到人地攞yoga mat嘅, 原來係body balance, 咁我又繼續玩啦, Pong就係出面舉下機等我, 又玩完一個鐘, 今次真係要沖涼走啦

到左啦‧到左啦

林海峰嘅talk show飛已經到我手啦, 仲有8日就到啦, 今次係信用咭嘅優先訂飛度訂嘅, 唔知會唔會好前呢????

上一次

不過有一樣野係好巧合嘅就係上次座位係84同85, 今次嘅座位都係84同85呀, 不過希望唔好好似上次咁遠啦

百厭龜

Pong屋企有兩隻龜龜養左廿幾年, 佢地比我初初見嘅時候又大隻左啦, 有時伯母拖完地, 幫佢地沖下涼之後就會放佢兩隻野出黎玩, 佢地兩個就會大家咬大家條尾, 有時佢地會抓上去我地d鞋度

笑屎

星期六晚去左apm行左一陣買戲飛睇戲, 之後仲唔知點解行行下會買左對鞋

買完野返屋企沖完涼10點到又去apm, 去左apm嘅美食廣場食野仲飲埋糖水添, 真係超飽, 食完野都係11點半, 行左一陣去埋toilet就等坐場

尼套戲真係要睇, 真係好好笑

唗銀紙

星期五我返左媽咪度, 直至晚10點先坐車返觀塘, 返到去走入房我已經見到PS3個盒係地下, 講左幾日終於都買左啦, 而且部PS2壞壞地喎, 而且佢仲話買左個24吋mon, 聽日比埋尾數就ok喎

小心身體

星期五開始有少少鼻水, 唔係好嚴重, 直至昨日係公司, 勁流鼻水同打丐嚔, 梗係係公司冷親啦, 老闆&M&GM嘅房都係西斜, 下午佢地間房會好鬼熱, 老闆每次返到黎就會較到凍一凍, 我地係出面就凍到雪條咁, 真係想攞件羽絨返工著

母親節

5月11日係母親節, 媽媽去左外婆屋企, 所以無同媽咪食飯, 成日都係屋企hea, 到7點幾同Pong屋企人去大排檔食飯, 等左好耐都無得食, 之後就去左觀塘街市嘅4樓, 唔洗等就有得食

星期六事項

8點鐘起身返工, 1點鐘放工, 坐車去cwb係lane crawford買左支香水

忙碌的一天

昨日請假因為要接爸爸出院, 10點幾媽媽打黎叫我起身, 11點去到醫院, 同媽媽食完早餐上病房, d醫護人員好忙呀, 咁我地就執好野等佢地攞d文件比我去找數同攞藥, 1點幾坐的士返屋企, 返到屋企坐左一陣去左沙田, 因為Pong留抵左野係屋企叫我攞比佢, 比完佢我又要坐火車轉地鐵去筲箕灣, 之前係東touch訂左野有得攞, 由筲箕灣行去什麼星島大廈問左好多人先行到

好多美食

Lunch去飯茶, 因為又有同事走啦, 要同佢farewell喎, 個飯盒又要隔多一夜啦

麻煩友

昨日10點幾起身, 11點出門口係旺角m記食早餐, 之後就去做運動, 玩12點10分嘅bodycombat, 又見到有人爭頭位啦, 到開始啦, 各不相讓我仲見到佢地踩對方添, 真係好好笑

兩日事項

4月30號星期日係我後面嘅同事last day, 雖然我成日都覺得佢好煩同埋有時真係好唔鐘意佢, 不過佢都教識左我做好多野, 佢亦都係眾人嘅師兄, 因為佢係尼度都做左10幾年啦

小學同學仔

4月26號個日係我小學同學嘅聚會, 分開左咁多年都可以約返出黎真係好開心, 點解今次會有尼個聚會, 其實係有三個同學仔分別係4月30, 5月1同5月2號生日, 咁5月1號生日嘅同學仔咪搞左今次嘅聚會囉, 真係真係真係多謝佢, 令到我地可以再坐埋一齊

遲到錢

我公司返9點鐘, 但到9點16分就要扣錢, 尼個遲到錢我咁耐都唔知點計, 因為我以家少左遲到, 我公司差唔多每一年都會用我地嘅遲到錢尼食一餐飯, 我記得上年係去紅磡個咩鬼大酒店就食buffet, 食完二老闆仲請我地去尖東唱k

同姓三分親《林》

昨日係林海峰是但嗡求其唱Part 2用AIG信用咭優先訂票嘅日子, 咁岩我公司其中一位同事有AIG信用咭, 所以我個病雖然剛剛好返我都比平時早3個字出門口, 因為要係9點鐘之前返到公司

輪到我啦

昨日早上起身就覺得想嘔, 坐車返到大圍頂唔順搵個公廁嘔完好返好多, 但無晒胃口食野, 早餐都無食, 成日早上好似發緊夢咁, 下晝lunch時個飯盒食左少少就唔想食, 之後就開始覺得占寒占凍咁, 個冷氣已經開得好細啦

生病了

爸爸病左啦, 入左e院兩日昨日下午做手術, 做左3個鐘, 6點放工即刻走人, 趕去瑪嘉烈, 入到病房, 有少少難以置信, 同埋個心酸左一酸, 因為爸爸麻醉藥剛剛過左清醒, 但瞓係張床度郁唔到好攰同好痛咁, 媽媽就畏佢飲水, 逗留到7點半要走啦, 因為過左探病時候

好睇

昨日星期日, 我地偷懶無做運動, 落下租碟睇同埋買左劉華演唱會dvd, 實在太正啦

大風大雨的週末

今日10點幾起身, 去左銀行好彩無咩人啫, 返屋企hea到12點幾坐巴士去沙田, 因為前幾日已經約左公司個reception (H小姐)一齊去shu uemura度拔眉約左5點

part II

前幾日聽收音機知道林海峰個talk show係5月會有part II, 尼幾日上網搵都仲未定售票日期, 只係知4月中信用咭預售, 4月尾網上訂購, 搞到我好心急, 雖然我已經睇過, 但我都好想再睇, 因為實在太太太正啦, 今次我都一定要買到票嘅

普通日

昨日係星期日, 世伯9點幾叫醒晒我地, 原來佢買左m記比我地食, 一人一個餐, 食飽hea到11點換衫去做運動, 12點10分bodycombat, 玩完坐車去中環, 因為猿人頭出左新tee, 去到比人賣晒啦, 但我唔執輸買左件牛角袖嘅衫同一對耳環, 之後行去上環食肉骨茶, 又+左價啦, 大約2月尾3月頭食一個中煲, 兩個油飯, 一份油條, 一支汽水埋單80幾蚊, 以家食返同一樣野, 埋單要1百零幾蚊, 真係咩都貴

啤啤貢

昨日放工放1點坐火車出旺角, 當我上到月台時剛好有車, 咁我就急急腳咁行入車啦, 我面對住車門, 左手邊有兩個女仔, 一個"埃"係玻璃, 另一個就渣就條柱, 佢地兩個識嘅, 開車一陣我感覺到有人望住我, 咁我就望去左手邊, "埃"玻璃個個無端端啤住我, 咁我梗係掘返佢啦

又食過

昨日放工坐火車去沙田搵Pong之後係上水等佢兩個同事+同事女朋友, 我地Book左大漁鐵板燒8點半, 好彩前日打去訂坐咋, 如果唔係有排等呀

從未如此痛過

昨日放工Pong係旺角等我, 我請佢食香格里拉米線, 食飽去換衫, 7點50分有堂跳舞堂係新開班架, 唔知咩鬼舞加咩鬼舞喎, 我一直以黎都好想玩跳舞, 因為我鐘意跳舞, 但又無人陪我學, 而且今次係新班, 一定好多人未玩過啦, 咁我同Pong就去試下啦, 新屎坑嘛

4月6日樟木頭last day

臨走前影返張先

4月5 樟木頭day 2

第二日1點幾起身梳洗好之後就出去搵野食, 去左我最愛嘅無名餃子館度食野, 一朝早兩個男人就飲啤酒啦

4月4日樟木頭遊

4月4日拜完山返屋企hea到5點半係觀塘等埋佢三日fd坐車出沙田, 之後坐火車去羅湖, 係羅湖再坐深圳火車去樟木頭

服務態度差&難食

昨日放工無做運動, 係旺角行左一陣, 去左女人街兩旁搵左一間食市度野, 入到去個裝修都幾靚, 不過扮有情調咁燈光勁暗, d食物勁唔好食囉, 服務態度又差, 因為有個女仔攞左個沙律黎, 我地無叫到(跟本我都唔食沙律), 佢問左我地兩次, 之後佢又同第二個人大大聲講, 佢地話無叫喎

觀塘的夜景

頭先睇完劇集無野做, 所以攞部相機出黎周圍影

無飯食的一天

係公司無咩特別所以無咩好寫, 放工無得去做運動, 因為”C”今日annual dinner五點幾關門

平淡的星期三

放完假之後都無咩事發生過, 所以都唔知寫咩好, 不過我又唔想等到有野寫時先upload, 因為都唔知要等幾耐

2008年興順大廈(觀塘)

昨日見天氣咁好, 但又無人陪我出街, 所以我係屋企影下樓下個街景

尼張我影左好多次, 但都影得唔好

一個人

今日Pong做伴郎所以7點幾起身, 8點鐘出左門口, 我10點幾起身換衫出門口, 出左旺角一個人去左大快活食早餐, 食飽坐到11點半去換衫, 12點10分玩bodycombat, 1點幾去沖涼之後行左去新之城買左兩塊masks去左香格里拉食米線, 食飽坐車返屋企

兩日事件

20號放工之後出旺角搵Pong, 行到8點幾同佢兩個同事係稻香排隊, 排到9點攞左票又要等叫枱號, 真係未試過排咁耐隊呀, 之後佢又有三個同事黎左總共7個人

遇上一個"火+頁"人

昨日放工Pong個fd約左佢去睇西裝, 又係因為23號個日, 我地6點半去到旺角, 我去左買辣魚蛋, Pong去買烏龍茶, 我好抵能呀, 聽到前面個女人叫$20魚蛋, 我又白癡到又跟住叫$20, 我明明想要$10, 到Pong行到黎話咁多嘅, 我先知我叫錯左, 點解會咁架, 結果食完$20魚蛋之後就好飽啦

好耐無見

昨日星期日本來想9點幾起身出旺角做運動, 點知瞓到11點先起身所以無去到, 伯世煮左水餃, Pong食完就返左工, 我係屋企打機

又忍唔住

今日6點走人, 同Pong出到花園街買左一串魚蛋, 之後去金都陪佢個fd試西裝, 因為23號要結婚啦, 而且係Pong做伴郎, 陪佢個fd試完8點去到尖沙咀, 佢套西裝終於改好有得攞啦, 攞衫之前我又買左個袋啦, 個袋我係non-no到見到, 之後睇左三次先決定買架

第一次

昨日6點鐘走人, Pong又係火車站等我, 一齊出旺角去左泰國人海南雞飯度食南雞飯, 越黎越唔好食, d飯太林啦

真係忘命

昨日朝早起身時打電話比會計請半日假, 因為實在太眼瞓啦, 瞓到11點幾起身伯母炒返前晚嘅飯比我食, 12點幾出門口返工, 其實我連下半都唔想返架, 因為有個同事要去旅行交低左d野比我, 所以我要返去搞, 不過都無咁眼瞓, 我唔明Pong4點幾瞓8點幾仲可以起到身返工, 真係勁

一人一鍋

前幾日已經約好Pong嘅同事昨日返深圳食飯, 直至昨日下午5點幾突然取消, 去到大圍火車站佢地又話做好晒野, 所以係上水火車站等, 去到搵緊路差唔多8點幾, 因為我地第一次去叫"豐滑火鍋", 而且前晚又無做足功課, 所以問左幾個人

一個普通的星期日

星期日9點幾起身, 搞下搞下10點出門口. 係觀塘大快活食早餐, 係買早餐時發生左件激氣嘅事, 當時開左兩部收銀機, 右邊個部有成6, 7個人排隊, 左邊個部有三個人(係一家人), 咁我地就排左邊啦, 點知個三個賤人一路睇個水牌先慢慢諗食咩, 個女人就一路問個收銀有d咩咩食, 可唔可以要咩咩咩配咩咩咩, 搞到右邊條隊仲快過我地, 我真係想頂頂頂頂頂頂

悠閒星期六

今日長週要返工, 返到公司就算有野做都唔想做, hea下上下網咁又1點, 本來諗住放工出旺角行下, 點解敵唔過睡魔, 坐車返到觀塘食左碗河粉, 以家差唔多隔一個禮拜六都食感覺有點悶, 食飽返屋企換衫瞓覺, 世伯伯母3點幾出左門口返大陸, 4點幾Pong打比我叫我起身, 5點幾出門口去尖沙咀, 佢係a.p.c度買左套西裝, 因為23號要做伴郎, 而且佢有好幾位朋友仔會結婚, 所以買一套著幾次

習慣

以家每朝我一定會聽在晴朗的一天出發, 其實我係為左聽林海峰, 不過佢以家仲放緊假, 但聽聽下又覺得幾好聽, 佢地講時事, 聽到返到公司就會熄機, 到4點鐘又會聽萬世巨星, 以前我好唔鐘意i love boy's, 因為我覺得佢地d做型好白痴, 但以家覺得少爺占真係超好笑, 有幾次我仲聽聽下笑左出黎, d同事就望住我

勁早

昨日又係9點返到公司, 1點食lunch, 6點鐘放工, Pong係沙田過黎係大圍搵左間餐廳食左少少野, 佢又被我傳染啦有少少傷風, 食完野坐車返屋企, 返到屋企無食飯, 沖完涼打機打到9點幾就瞓覺啦, 瞓到11點幾醒左一陣去左個廁所, 再瞓到第二日啦

繼續努力

尼幾日Pong夜晚會買定第日嘅早餐, 佢會係屋企沖咖啡飲, 我會攞返工食, 雖然每晚都好夜瞓, 但早左好多起身, 可能天氣暖左嘅關係, 仲可以舒舒服服咁坐巴士, 唔洗同人迫

浪費假期

昨日係星期日11點幾起左身, 好似比人打左一身咁, 12點幾去左apm吉之島個層嘅百瀧度食野, 食飽就行返屋企, 醫生2點半先開, 返到屋企就瞓係sofa, 瞓下醒下瞓到5點幾先落街睇醫生, 之後Pong同我味千度食野, 食飽去吉島買野買左百幾蚊, 返到屋企又打機, 打左一陣世伯伯母返黎啦, 10點幾去沖涼, 沖完涼又上床打機, 12點瞓覺啦, 已經早又啦

中招

星期二睇完林海峰之後就覺得喉嚨唔舒服, 可能笑得太犀利, 到星期三開始有少少咳, 星期四有少少啖, 但又咳唔出成日係喉嚨度卡住卡住好辛苦

唔洗瞓啦

昨日返工成個人都無咩精神好眼瞓, Lunch reception姐姐坐係我隔離位一路食一路吹, 放工無去做運動, 因為世伯生日要出街食飯, 係觀塘附近食, 係就係好平啦$6xx五個人, 仲有淨餸添, 不過唔係咁好食囉

感應

唔知點解Pong每次搵唔到自己嘅野一定會叫我幫佢搵, 但每次我都搵到, 有時佢搵個樣野只不過係比第二樣野"姐"住, 細心d搵就會搵到

08林海峰~求其大合唱

真係興奮到想打埋個blog先瞓呀

首先今日6點鐘即閃, 出左旺角因為Pong遲左四個字走, 係旺角食埋野就坐車去紅磡, 好多人買精品呀, 咁我梗係唔執輸買左個8達通套啦

拆利是

昨日係星期日偷懶無去做運動, 瞓到11點幾起身拆利是, 唉!!!2000蚊都唔夠呀, 真係慘啦

山頂遊

昨日星期六我同同事調左週, 所以我唔洗返工, 8點幾起9點幾出門口同Pong一齊去中環搞D野, 10點半係食熱狗個度食早餐, 食飽左就諗去邊, Pong竟然提意去山頂呀, 好彩我有帶相機啫

美食日

以前每日我只係會帶一個飯盒, 以家就唔係啦, 如果夜晚有我鐘意嘅湯的話我一定會帶埋返工, 咁就唔會覺得悶啦, 今朝伯母幫我整雲吞, d雲吞係夜晚佢地自己包架

好清靜

今日係星期五, 所以d同事出晒去開會, 我上網上到10點就有野做啦, 要3點鐘之前做起比同事攞出街, 到下晝兩個m又走左, 好幾個同事又去開會, 老闆淨係係房度又唔會出黎, 而我後面嘅麻煩友又成日都唔係度, 因為佢星期五下晝就會返嘅, 唔知今日咩事呢, 不過都幾好呀, 耳根清淨

難度高

昨晚6點鐘放工走人, Pong係火車站等我去食花園街嘅辣魚蛋, 之後又係新之城買$10四包撈撈撈食, 剛剛新之城個電視新聞講緊肥姐, 好多人企係度睇, 睇完新聞去換衫, 玩7點50分嘅bodycombat逢星期二都咁鬼多人嘅, 玩完之後我再玩yoga, Pong就係外面玩機, yoga d動作好難, 雖然係慢慢咁做, 但都出晒汗, 我記得以前係工聯會都玩過, 但個時d動作容易好多, 玩到10點去沖涼, Pong話唔想返屋企食飯, 所以係女人街行左一個圈, 去左沙嗲王度食野, 叫左三個小食一個飯同一碗棷汁黑糯米, 超肚呀, 之後就坐車返屋企啦, 返到屋企睇左一陣肥姐嘅"什麼40載"之後就睇我嘅"公主小姐"啦, 又差唔多兩點先瞓啦

20080218

9點1返到公司, 一路做到Lunch有帶飯終於唔洗叫外賣啦, 一路食一路同reception傾計, 係度講護膚品, 好快就2點啦, 又要做野啦, 坐我後面條麻煩友又叫我做野啦

熱狗

昨日星期六短週, 1點幾去麗港城幫Pong整野, 但3點半先開門, 所以都係下個禮拜先搞, 之後坐車返青衣抄返之前download嘅戲返觀塘睇, 5點幾出旺角搵Pong, 坐車去中環, 跟住就去食熱狗, 個度嘅熱狗好好食架, 間餐廳好似叫咩樂園, 不過條腸就細左d囉

出晒汗

昨日返工都仲有利是逗, lunch無帶飯又要叫外賣, 6點鐘準時放工, 出到旺角搵Pong買左$10四包嘅撈撈撈食同埋珍珠奶茶, 食完去換衫做運動, 7點50分嘅body pump, 玩到腳仔都痺埋, 之後9點鐘bodycombat, 好耐無試過連續玩兩樣啦, 好少人所以有好多空位唔洗咁迫, 係咪因為尼個係我喜歡嘅教練呢, 所以打拳都出力d, d汗仲勁好似沖完涼濕晒

情人節

昨日係情人節早上8點就起身擦牙洗面, 返到公司9點2食完個包就開始做野, lunch無帶飯所以叫外賣, 食飽飽之後瞓左半個鐘, 做到4點幾同事一齊食生果, 因為前幾日有判頭買左生果籃比我地, 5點幾我地個reception小姐收到佢男朋友送來嘅公仔, 6點鐘走人, 出到旺角搵Pong, 佢買左份禮物比我

人日

新年嘅假期終於都完結啦, 今日8點鐘就起身唔洗同人迫地鐵&火車, 返到公司都未到9點, 唔知係咪放得太耐嘅關係, 自己都唔知自己想做咩咁, 之後同事開始返黎啦, 結左婚嘅同事就周圍派利是, 我都講左好多句恭喜發財啦

最後兩天的假期

今日Pong要返工, 下晝12點幾出旺角同佢去左北海道食壽司, 之後坐地鐵去深水步, d商場真係好鬼焗, 搞到我又傷風啦, 行左3個鐘買左memory stick, card reader, 買完我就坐小巴返屋企, Pong就去返工, 5點幾佢就放工, 我食左兩粒傷風藥, 勁眼瞓, 係sofa瞓到9點幾去左apm嘅牛陣食野, 個度係90分鐘任食, 比個甜嘅湯底自己加料, 咁就食左5百幾, 我覺得一般啦, 試過完一次唔會再想去囉

大嶼山之旅

今日一早8點起左身, 9點出門口同世伯伯母Pong食早餐, 食飽飽坐車去東涌搭360去大嶼山, 咁大個女第一次去大嶼山同坐360, 有d緊張, 去到東涌勁多人, 排左一個鐘先上得車, 上到車比我想像中ok穩定, 係車上面係咁影下面嘅風景, 不知不覺就到左啦, 係昂坪個市集度勁大風, 伯母仲送左個馬騮仔嘅公仔比我

2008年初二

同Pong瞓到12點幾, 伯母煮飯食, 食飽坐一陣又瞓過, 瞓到6點幾起身落街買六合彩同埋係吉之島買紅瓜子食, 買完返屋企坐一陣又食得飯, 沖埋涼10點幾落街還碟&租碟, 又買左$20腸粉, 燒賣返屋企食, 食飽睇碟, 睇到2點幾瞓覺啦

20080207大年初一

11點幾就起身, 12點幾食中午飯, 點幾換衫同世伯世母佢弟弟Pong去佢舅父屋企拜年, 去到2點幾之後打麻雀, 打到6點幾我win左差唔多$100, 跟住就開飯, 食飽佢地又打過, 打到10點幾走啦, 返到觀塘好多小販檔, 租左兩隻碟, 買左$20腸粉, $18一碗翅, 兩串魚蛋, 返到屋企就一路睇一路食, 個腸粉超好食, 但係翅就麻麻地啦

年三十晚

今日已經唔洗返工啦, 瞓到12點幾返左青衣, 要攞利是封比媽媽, 放低左就走啦, 約左Pong係青衣城坐地鐵去中環行街, 行左一陣出銅鑼灣, 勁勁勁多人呀, 行到5點幾返左旺角Pong公司打咭, 要幫埋佢d同事, 之後坐車返觀塘, 坐小巴都咁多人

大掃除

今日係年廿九, 朝早返到公司趕住做D文件下晝比人送出去, Lunch全間公司嘅同事一齊飲茶, 開左三圍枱, 食完飯返去之後就一直上網玩msn直到6點, 6點出旺角搵Pong去食章魚小丸子, 跟住就去做運動, 7點10 bodycombat玩一個鐘, 沖完涼行左一陣街坐小巴返屋企, 個小巴司機真係好似賽車咁, 4分鐘就到九龍灣

皆大歡喜

昨日返到公司已經見到盆吉擺左係門口, 真係有D衝動想攞一粒黎食, 下晝會計姐姐攞左個白信封比我, 裡面係300蚊百佳禮卷, 得我同另一個女仔有啫, 因為我地都抽唔到獎, 真係好啦, 到5點幾上網係百老匯訂功夫灌籃

又見到啦

昨日同Pong行完街返到屋企10點幾, Pong話要玩清衫大行動, 佢執完到我自己執, 哎呀!!!又見到三條黑色毛毛蟲啦, 點解會咁架, 前幾日我係日本城買左臭丸, 已經放左幾粒啦, 之後伯母比左d醋我抹下個櫃筒, 搞到我成晚都好唔開心呀, 點算呀, 之前清潔完又有, 點解點解點解點解點解點解點解??????

開心團年飯

昨日由3點幾瞓到6點媽媽打黎噪醒我, 換衫出旺角搵Pong坐地鐵去葵芳轉車返青衣, Pong係超市買左兩支紅酒, 去到青衣真係凍好多, 返到屋企第一時間梗係派錢啦, 咁姐姐8點幾返黎啦, 我就攞d野比佢, 嘻嘻, 佢話我係叫你買比我呀, 不過姐夫就好開心, 仲即刻攞出黎睇添, 咁我地無等哥哥就開飯啦, 食到9點半到佢就同個衰女人到啦, 可能我都飲左好多紅酒, 所以我昨晚好多野講, 好開心, 最開心都係見到姐姐同姐夫收到份禮物個時個感覺

姐姐的禮物

今日係長週所以要返工, 超凍所以唔係好想起身, 拖到8點3坐地鐵轉火車, 尼幾日就算公司個冷氣開到好細到好啦, 我隻手都好冰咁, 熄左佢又焗喎

真係無抽獎運

昨日係公司嘅annaul dinner, 朝早返到公司幫手搞野, 到下晝有兩三個同事出去攞花, 到5點鐘全公司嘅人都走啦, 我地係尖沙咀嘅港晶中心一共開左30圍, 一去到全部女仔都坐係接待處幫手, 8點幾開始埋位, 坐定定之後就係manager講返兩句, 跟就同老闆成班m飲杯, 咁就開始第一輪嘅抽獎啦

好暖呀

昨日放工出左旺角中心買絲襪, 買完就去搵Pong, 尼幾日超凍, 我日日見到佢就話好凍好凍, 所以佢同我坐地鐵去又一城嘅patagonia度睇褸, 最終比我買左件, 咁我就即刻著左上身, 連原本著住個兩件衫都除埋, 得一件衫係裡面, 真係暖好多呀

回暖返少少可以嗎

天氣越凍朝早就越唔想起身, 拖到8點2, d水好似冰一樣, 返到公司9點12分, 都算幾柔閒做下野又上下網

凍柑

昨日返到公司9點12分, 坐低之後就食面包, 一路做都無停過, Lunch叫外賣, 食飽上網好快又到2點, 下晝開始無咩做, 4點幾公司兩個煩人去左開會, 又係上網, 6點半先走, 出到旺角買兩張六合彩, 之後一個人食左碗河粉, 7點半Pong終於放工啦, 跟住坐車去尖沙咀行左一陣, 到9點坐車返觀塘, 返到屋企食左少少飯睇完電視沖涼, 沖完涼上床打機, 如果我沖完涼即刻上床的話, 隔一陣我隻腳又會變冰條, 前幾日就係咁啦, 所以我晚晚都請Pong食凍柑, 我晚晚就比人鬧, 但係唔整暖隻腳我就好難瞓得著啦

買咩好

昨晚7點幾阿媽打比我叫我2號返屋企食飯, 家姐1號生日, 媽咪叫我買生日禮物比佢, 我都唔知買咩好, 佢有無2個月啦, 買補品比佢我怕會好貴, 買大肚衫比佢我又唔識揀, 買禮物尼家野真係頭都痛埋

孤伶伶

今日係星期日Pong要9點幾就起身返工, 我10點幾起身擦牙洗面, 出旺角搵佢食野之後做gym, 12點10分上bodycombat

又白又滑

今日係短週唔洗返工, 瞓到10幾換衫出旺角搵Pong食飯, 食飽飽我坐車出尖沙咀行街街, 因為take 5今日大減價, 係人山人海之下比我揀到兩件衫, 一件係我一件係Pong嘅, 買完衫坐車去旺角等我同事, 佢帶我去佢做開個間美容院度做facial, 5點去到幫我洗面之後就同我吱黑頭&粉刺, 真係痛到阿媽都唔認得, 搞掂晒所有野成7點幾啦, 咁我同事就去搵佢男朋友仔, 我就去搵Pong, 買左杯珍珠奶茶之後就坐車返屋企啦, 返到屋企開飯啦, 之後就睇佳麗, 以家我塊面好乾淨呀, Pong初初見到我時好似叮左一聲咁, 白左好多呀..

20080124

因為昨日sick leave所以今日返到黎好多野做, lunch又係食健康飯盒, 唔知係咪食得藥多, 搞到條俐好"鞋"

收到啦!!

今日伯母係信箱度攞信, 見到有我相喎, 哈哈, 訂左林海峰終始到手啦, 好開心呀, 之前仲係度諗會唔會寄失, 同埋點解唔掛號, 以家放下心頭大石啦, 快D到2月26號啦

得我一個

今日返到公司左咩事發生, 好清閒, 到食完Lunch之後我後面個麻煩友又返黎啦, 又係我後面喃喃自語啦

昨天

星期一又要返工啦, 尼幾日唔知發咩姣每日都夾下個頭同埋夾下眼睫毛, 搞到要迫地鐵&火車, 為左訂林海峰, 我用左差唔多一個早上黎搞, 張我嘅工作放係一邊, Lunch又係食健康餐, 食飽飽睇下blog又夠鐘做野, 5點幾打比Pong話佢知我想食煲仔飯, 有位同事次次好鐘意5點40幾分比野我做, 真係好鬼煩

黃天不負有心人

嘻嘻嘻嘻嘻…今日林海峰求其大合唱嘅talk show公開發售啦, 我由9點幾開始去城市電腦售票網度, 終於係差唔多11點嘅時候比我入到去啦, 好辛苦先search到兩張連位, 我超開心呀, 真係想快d到2月26號呀

yeah!!!!yeah!!!!yeah!!!!yeah!!!!yeah!!!!

超級無聊日

昨日係星期日, 朝早10點去同世伯, 伯母, 佢弟弟同埋佢女朋友, 6個人去飲茶, 飲到11點幾就返屋企攞衫去做運動玩bodycombat, 玩一個鐘1點幾去沖涼, 之後Pong想食肉骨茶, 但又唔記得佐敦邊度, 所以決定坐車去上環食, 係中環落車, 又係行個d地方, 不過今次比Pong買左對鞋, 跟住就去食野, 真係好好味, 我已經炒低左個電話啦, 食完行左去個咩街市見到駕好型嘅警車

聽到聲呀

昨日返工無咩做, 下晝又要開始問判頭有幾多人黎同埋贊助d野, 做尼d野好煩呀, 講到口水都乾埋, 6點鐘放工, 返到觀塘打比Pong叫佢落黎, 因為佢要去麗港城嘅牙醫度洗牙同埋補返隻牙, 佢好緊張呀, 佢入左去之後, 就聽到d"吱吱"聲, 哎呀!!!聽到都覺得恐怖呀, 洗完出黎真係乾淨左, 搞到我又想去洗, 但我又怕喎, 都係算啦, 等我做好心理準備先再講啦

好眼瞓

今朝起身十萬個唔想返工, 諗住去完廁個所再瞓, 不過諗諗下都係唔好啦, 請假要扣錢嘅, 返到公司唔算多野做, Lunch食飽飽就瞓左半個鐘

打敗左

昨日11點幾拆聖誕裝飾, 換左d新年裝飾, 搞到成手都係金粉, 下晝同事都開完會返黎, 頂你!!!一返到黎開到個冷氣鬼咁大, 搞到我又開始係咁流鼻水同打丐嚏, 真係痴線, 自己熱就著少d衫啦, 好黑人憎, 明明人地無病都變有病

勁野喎

前幾日耀媽介紹左支痱滋膏比我, 咁我昨晚返到觀塘就去x春藥房問下有無啦, 真係好彩佢竟然有得買, 買左返屋企咁我第一時間塗下先, 因為實在太痛啦, 塗完佢好似層膜咁刮到粒野只係有少少痛, 不過食完飯又痛過, 痛到痺痺地咁, 臨瞓前再塗多次, 到今朝起身擦完牙再塗, 直到以家已經無咁痛同咁大粒, 頭先食野時都唔係咁痛, 不過唔知點解飲水時就痛啦

咁早嘅

朝早落到巴士站竟然見駕車剛剛走, 所以都係坐地鐵轉火車好d, 返到工做下做下又Lunch, 做下做下又放工, 時間真係過得快, 放工Pong打比我話佢好攰, 所以唔做運動啦, 咁我就坐車返屋企啦, 7點鐘就到觀塘, 8點幾食飯, 戈師乃做左咁多日, 我都係第一日睇, 9點幾個個瞓晒, 得返我同伯母兩個睇"律", Pong話佢第四隻智慧牙出, 所以唔舒服要早d瞓, 睇完電視沖埋涼, 連伯母都瞓埋, 我一陣梗係去打機啦

求救@@

大約上個月的某日我執放褲嘅櫃筒, 比我發現左兩條好細嘅毛毛蟲呀, 真係嚇死我呀, 點解會有架, 我之前已經放左臭丸喎, 搞到我當日個身好鬼痕, 以家諗起都怕怕

我很忙

我發覺我尼排好忙, 搞annual dinner嘅野, 自己嘅工作又做唔晒, 到Lunch時食完飯上一陣網又要打nds, 打到2點又要做, 放工又要做gym, 玩bodycombat, 返到屋企睇一陣電視又夠鐘瞓覺, 我覺得d時間好唔夠用...

星期三的活動

下午出左去飲茶, 因為有同事生日, 食完飯返到公司都唔算太忙, 6點放工, 我係大圍站等Pong一齊坐車去羅湖, 去到羅湖都幾多, 10個男人裡面先得1個女人, 之後我地坐深圳地鐵, 坐左3,4個站再行15分鐘就到啦, 我地去左巴蜀風食四川菜

無得睇

昨日Pong買左本milk, 見到林海峰又有talk show, AIG信用咭優先訂票, 咁我今日就問同事有無AIG啦, 比我搵到同事嘅朋友有, 咁我就叫佢幫我啦, 個答案係無晒票啦, 好失望呀, 9號先開始優先訂, 咁快就無晒, 唉!!!!!

好無聊呀

今日返工用左大半日嘅時間整請柬, 我自己嘅工作一d都無做過, 擺到成個tray都係文件, 真係可憐!!!!放工出旺角搵Pong, 食完m記就唔想做運動, 坐車去左中環行街, 之後坐叮叮去銅鑼灣, 夜晚坐真係無咩人喎, 好舒服

20080107

今日係公司都算多野做, 因為要幫手籌備今個月31號嘅annaul dinner, 下晝又要做自己野, 好快就放工, 6點3走人, 出到旺角Pong仲做緊野, 咁我就行一陣等佢啦, 行到sasa咁我入去睇下野啦, 見到有兩個男人"橋"住手入黎, 一開聲勁乸, 真係嚇死人, 之後Pong就打黎啦, 咁我拎d衫擺係locker先, 之後就去食章魚小丸子, 真係好味, 食飽行一陣, 行完一陣Pong就話唔想做運動, 咁就攞返d野, 行左一陣信和買左兩本書, 就坐車返屋企,  返到屋企睇完劇集打nds, 打到11點幾先去沖涼, 真係想早d瞓都唔得添

又有得玩

昨晚我上網又比我搵nds games, 就係新牧場物語2啦, 尼隻game又要睇攻略黎打啦, 以前見Pong成日拎住d紙一路睇一路打覺得好煩, 仲成日會笑佢添, 點知以家論到我啦, Pong仲話我以家有game玩唔洗噪住佢喎, 佢不知幾開心呀

失望

唉唉唉!!!!!本來plan好下個月十幾號會去台北旅行, 我已經諗好行程, 點知昨晚Pong同我講話應該去唔到, 因為今個月佢會調去第二個site, 原先佢以家做緊個site係下個月就交貨, 咁佢就會無咁忙就可以去, 點知以家,

唉唉唉唉唉...

我要去我要去我要去我要去我要去我要去我要去

20080103

今日又遲左起身要坐地鐵轉火車, 返到公司都係9點1, 早上比較多野做, 到下晝就同同事MSN, hea到6點走人, 出左旺角食左辣魚蛋, 之後買左面包比Pong食, 買完佢都仲未放工, 咁我就去買六合彩

08年的第一天

昨天是08年嘅第一日, Pong竟然要返工, 咁我就瞓到12點換衫出旺角搵Pong食Lunch, 食飽飽同佢行左一陣就返屋企啦, 返到屋企一個人都無, 上下網4點幾食左個辛辣麵, 超好食, 玩左一陣wii fit佢媽媽就返黎, 所以我都收機比佢睇電視

火+頁

Pong屋企有兩部遊戲機, 一部PS2, 一部wii, PS2擺係Pong房, 咁wii梗係擺係廳啦