20070630

鬧交中, 唔返大陸

20070628

放工無得準時走，因為我仲未做晒d野，一做就做到7點，之後我即刻趕去旺角搵Pong，點知佢已經做緊gym啦，連7點50分嘅Body combat都玩唔到，唉！我今個禮拜玩左一次咋。

快d放假啦

唔知係咪尼個禮拜放3日假所以搞到我無心機做野，尤其是食完飯兩點鐘之後。由兩點半開始我就不停咁望個鐘，希望可以快d到6點，但我手頭上做嘅野，做黎做去都係o個樣野，好似唔想做完咁。

敵人

昨晚做完gym返到屋企執埋臭衫都差不多12點，去埋廁所就可以瞓覺，當我準備沖廁時望去後面比我見到隻超大嘅曱甴，我就立即開熱水爐，之後我就企係到望住佢，敵不動我不動，佢突然行入去d日用品中間，所以我就拿起衣架用我嘅玉女劍法整返佢出黎，整左一陣佢跌左係拖地個桶到，之後佢弟弟幫我開燒水整死佢，隔一陣佢就張d水沖落廁所....ByeBye....以後唔好見，我就可以安心瞓覺啦。

20070624

早10點起身擦牙洗面換衫，之後叫Pong起身，未夠11點就出到旺角，Pong帶我去食餈飯，我覺得佢屋企留下嘅好食d。之後就慢慢行去中心換衫，今日可能係星期日所以無咁多人，等緊玩Body combat時我都做做器械，12點開始排隊等，教開那個教練放緊假要3個星期先返，尼個係代教，所以氣氛都唔係咁好，玩完1點幾就去沖涼。

健身 17

昨日下午放工返到屋企2點幾，到5點鐘執野去做gym，去到旺角剛好Pong放工，我左買撈撈撈食，食完去換衫啦。

今日我好犀利無同教練講價好快咁做完啦，到最尾佢又幫我拉根，佢話我都幾軟下，仲問我可唔可以張隻腳勾係個頭度，我話差少少，跟住教練話佢可以之後我就叫佢試下，佢真係得喎，幾勁呀。

我上完堂就到Pong啦，我就去樓下燒下卡路里。跑到9點Pong上完堂黎搵我之後就去。

超低能

今朝個鬧鐘響左三、四次我都按熄佢再瞓，結果成8點先起身，之後擦牙洗面帶Con，帶左上去死啦咁鬼模糊嘅，之後再除出黎洗洗佢，結果都係一樣〈死啦係咪我隻眼有問題呢？？〉，所以我開左第二對新嘅又無事喎，我細心留意下第一對，原來係兩隻"痴"埋左一齊呀，諗諗下我昨晚唔記得取Con瞓覺呀，唔怪得知睇唔清楚野啦帶住一對又帶多對上去。

真係恐怖呀.....

20070621

昨晚終於去左做gym啦，仲趕得切玩7點50分嘅Body combat添，不過今次Pong無陪我玩，因為佢仲咳緊，怕玩玩下仲咳得嚴重d喎。平時教開嘅教練都放假，所以昨晚係第二個教練，我覺得佢教得好得意，話佢好又唔係唔好又唔係，總之就一半半啦，不過佢唔係好夠氣囉，因為一路打要一路講，開始左半個鐘之後就見佢喘晒氣囉。

銀針粉

昨日都仲係咳個人仲有點攰，所以無去做gym，由星期一到現在都未去過。放工返到屋企7點鐘，8點鐘就食飯，食我最愛嘅銀針粉，我又係食左三大碗，好味........

隔隔隔夜飯

今朝起身好鬼攰，咩都唔想講，搞掂晒野就出門口，去到大圍買左個面包返公司食，之後就一路做到1點鐘，我本來星期一諗左帶飯，點知無返工，個飯盒就留到今日先食，係屋企我又唔想叮返黎食，又唔想掉左佢，所以咪隔左咁多日囉，好彩仲食得啫。

20070618

今日好準時起身，不過把聲變晒，而Pong仲咳得犀利，所以我地兩個都無返工，繼續瞓到10點幾之後落左樓下睇醫生，跟住買左兩舊餈飯但無得飲凍豆漿呀。

終於病左

由昨日開始我同Pong就開始咳啦，今朝9點幾就起身，Pong好似比昨日咳得嚴重喎，梳洗好就執野去"海x粥店"度食野之後就坐小巴去旺角，11點半換完衫就去做下器械之後11點45分排隊等玩Body combat，教練要放3個星期假去旅行呀，起碼要七月十幾號先返黎，真係有d唔開心添。

健身 16

6點幾去到旺角食左個"撈撈撈"，約左教練7點，今日佢叫我做25下呀，但做3set，不過做到十幾下我就腳軟啦，不過我都捱埋佢，教練都話good呀。8點鐘佢無學生，所以同我拉下筋，拉嘅時候好鬼痛，拉完又好舒服。做完之後去左，跑到15分幾Pong同教練黎搵我，因為Pong要買奶粉同藥喎，係增加肌肉我唔食得。8點45分排隊入房玩Body combat啦，玩完沖完涼都10點半啦，返到屋企食埋飯執埋野12點就啦。

病態購物狂

昨晚放工去左尖沙咀，因為我想去住好D度買縮骨傘，其實買縮骨傘尼個念頭我由上年雨季開始，不過搵唔到合心水的，終於比我買到啦，係一把黑色，有暗花嘅，圖案係咸濕版報紙。$17x

上海菜"留園"

昨晚返左大陸食上海菜，店名叫"留園"，入到去裝修都幾令，張凳仲好鬼舒服添。

第一道菜，初初我以為係好似d葱 o個 d味，但食落好香架........

20070612

放工時行到半路落大雨，仲有20幾步就到火車站都唔比我行埋佢，我企左一陣都唔見細雨，所以數一二三就匆過搞到D頭髮都滴晒水。去到旺角Pong係香格里拉已經幫我叫定野食，食完就去玩body combat啦，今日玩7點50分。

完來真係好攰架

由上上上個禮拜開始除左星期三之外，玩足六日，一至二、四都玩Body combat，五上完教練又玩Body combat，六雖然無得玩但我要陪Pong因為佢要上堂，日就係我最喜歡嘅教練教梗係要上啦，所以明天星期三真係放工早d返屋企休息下先。

Pong話我最近大食左好多，而我自己都發覺，因為以前做運動之前如果食左野我返到屋企係唔會食飯，但以家每次玩完我都叫肚餓，而且仲食好多添，玩得咁辛苦又食返，但係食係人生一大嘅樂事嘛。都係忍下好d為左九月十三號。

試伴娘衫

昨晚約左家姐7點係婚紗店等，店裡面有個3歲嘅小女孩好搞笑，初初我仲以為係家姐個fd個女，因為佢成日同我地講野，最好笑係我家姐每換一套衫出黎佢都話好靚呀好靚呀，姐夫就話得啦你唔洗再Sell啦。

發左瘋

昨晚做完gym 9點幾返到屋企先知佢爸爸媽媽＆弟弟返左大陸，所以無飯食，之後佢煮左個快熟通心粉同叮熱左一件Pizza食，食完就去左apm度行下，點知就出事啦。

扭扭

昨晚做完gym已經10點幾，我地兩個都好肚餓，咁岩對面有間pizza hut，咁岩我同佢又想試下扭扭批，11點鐘last call，所以坐底左之後就即刻叫野食啦，我地叫左個扭扭批套餐，兩杯飲品、泡芙同一個大批，仲另叫一客雞翼。

因為我同Pong好肚餓，所以客雞翼一黎到就食晒啦。

健身 15

6點幾去到旺角，見有d時間就同Pong去買撈撈撈食，係附近見到有人好似派緊red bull喎，問Pong去唔去攞，佢竟然話我係貪小便宜怪，香港地有邊個唔貪架？？

20070608

今早出門口坐Lift落到樓下先落雨，搞到我要返上樓攞傘，結果坐遲左一班車，去到大圍又勁大雨。12點幾郵差叔叔派完信之後我就去攞信啦，事關下晝請假要去睇醫生，所以想做晒每日要做嘅野先走。唉！自從天氣勁熱之後額頭出左好多瘡同油滋粒，情況非常嚴重，我已經嘗試張額頭嘅頭髮夾起但都無改善過，所以想去醫生度攞d藥膏塗下囉。

以前 vs 以家

昨晚Pong成兩點幾返，我諗係去埋massage先返。

記得初初同佢拍拖時佢嘅朋友又係叫佢返大陸食飯，不過佢那時12點已經過左關返黎香港仲第一時間打比我，又話朋友叫我massage我都唔去返黎陪你。

無我份

因為Pong同另一個同事一齊升職，所以會請以前地盤嘅同事食一餐，定左係今晚。我問佢去邊樹食，又係返大陸，我話要去佢又唔比，之前又話如果同朋友返大陸食飯的話會帶埋我去，結果又係講大話......成日都淨返我一個

死白痴婆

我同Pong玩Body combat多數都係企係前第二排，但會隔開少少位，因為有時會起飛腳同出拳。昨日同今日放工都有去玩，一樣都係企係差不多位置，但我企那個位後面有條鏡柱，通常都唔會有人企，因為太迫。

喜訊

話說我有兩個朋友分別係5月同6月結婚，今年收炸彈真係收到暈。昨日下午同Pong玩完Body Combat之後去左銅鑼灣行街街，跟住就接到家姐電話。
家姐：阿媽有無同你講？？
我：講咩？？
家姐：你做過幾多次伴娘？？
我：無呀，淨係做過姊妹咋。
家姐：咁如果我搵係做伴娘你識唔識做呢？？
我：好，是但囉，咁幾時？？
家姐：9月13號囉
我：咁快，你以家先話我知
家姐：Book到酒樓先講嘛，咁你要開始收身啦喎，仲要請假啦。
我：收緊啦，係咪做伴娘我都要請架啦，好啦Byebye   家姐：係咁啦
收左線之後我同Pong講佢竟然話，吓！真係想炸死人咩

20070602

今日短週所以唔洗返工，本來應承左Pong話煮早餐比佢食，點知佢返左工我都唔知。10點佢打比我噪醒左我，瞓唔番我就起身擦牙洗面，睇Hello, 小姐啦終於睇完啦，都幾好笑，女主角又瘦又靚女真係羨慕，1點煮左個辛辣面食，hea到4點又去瞓覺，6點幾要起身，約左Pong8點20分係中心門口等，因為佢話今日做完運動想行下街。行左一個鐘之後就去左"北海道"食迴轉壽司，真係好鬼好食啫。食完就行左去睇波鞋，佢話對波鞋爛左喎，之後就搭小巴返屋企，係樓下租左隻"幽靈車神"，沖完涼就舒舒服服咁睇碟啦。

健身 14

今日Pong要上什麼安全課〈公司叫〉，所以我自己去做GYM，約左教練7點鐘，放工就即刻搭火車仲趕得切食$10四包添，由火車站行去兆萬都流晒汗。

其實我同Pong由星期日開始每日都去玩，真係玩足六日，仲諗住上完教練堂玩body combat因為有我最喜歡那個教練教呀，不過我諗上完堂之後我都筋疲力盡啦。換完衫遲左一個字添，我真係撞鬼佢又比咁重我玩，連行樓梯落樓我都腳軟，佢仲問我做咩...〈你都問得出〉仲話下次加重d。佢教完我之後去左跑半個鐘，本來佢叫我跑40分鐘，但我以返屋企睇"溏心"

明天Pong要見教練啦，不過我要休息啦，陪唔到佢。祝佢好運