相機呀, 相機

尼幾日都無咩好寫, 都係返工放工咁...


今日10點起左身, 10點半出門口, 搭小巴出旺角去左大快活食早餐, 食到11點半慢慢行去"C", 玩12點10分嘅body combat, 等緊嘅時候Pong問我仲想唔想學泰拳, 我梗係想啦, 不過無人陪我學咋, 1點10玩完, Pong去做機我就行下路, 行左半個鐘度我就去沖涼先, 2點幾沖完涼走左去睇相機...好想買呀, 睇左好幾間, body shop落上嘅電器鋪玩左一陣相機添...

中秋節翌日

8點鐘佢爸媽阿姨已經出左去飲茶, 因為伯母同阿姨約左人10點做facial, 咁我同Pong就11點半起身. 一起身擦完牙就開始食零食, 到12點半我地就同世伯出門口去搵伯母同阿姨, 之後出去食野, d野食超咸, 食到2點幾間酒樓已經開始熄燈, 我地都走啦, 去左超市但停電所以都係返屋企, 我同Pong去洗頭, 洗完頭返屋企, 返到屋企佢又攞書睇, 我就瞓覺, 瞓到5點幾睇合約情人, Pong睇睇下都瞓著左, 到6點幾就開始換衫執野, 7點幾就搭$2車出章木頭食飯, 去食三杯鴨, 幾好食架, 我第三次去食, 食完飯搭9點22分嘅火車返羅湖啦, 返到屋企成12點, 沖完涼打左一篇Blog就瞓覺啦...

中秋節

25號放4點, 但我4點45分先走, 因為Pong係公司突然比人捉住左, 之後我係大圍火車站等佢搭火車到羅湖, 其實都唔係好多人咋, 過左關搭火車返章木頭, 20分鐘到, 之後去超市掃零食, 買左3大袋都係$11x咋, 不過攞到我地兩個死死下, 無法啦要食就要辛苦d啦, 之後就去搭康湖渡假村嘅專車, Pong有住客證所以唔洗錢, 我就要比$2, 返到屋企執緊零食時佢爸爸媽媽同阿姨已經返到啦

20070925

祝各位人月兩團圓！！

唔知今日有無得放早呢？？今晚我會返章木頭.............嘻嘻

20070923

今日10點半起身梳洗完之後就食左個菠蘿包, 11點10分出門口同Pong一齊去做gym, 12點10分開始玩body combat, 到1點10分就玩完, 之後Pong做左一陣機, 我就去行下路, 唔知係咪朝早只係食左個包, 所以一路行一路肚餓, 1點半就去沖涼, 之後就搵左間麵店食左碗麵, 食完就搭車返屋企, 返到屋企換完衫就攤上床瞓覺, 6點半起身去九龍灣同Pong D fd食飯, 因為其中一個女仔生日, 去左德福6/f嘅魚一丁食日本野, d野真係ok喎, 10個人食$1083, 不過如果兩個人食一定唔抵, 9點幾食完野去左飲糖水, 佢有兩個fd食榴槤飄香, 我同Pong嗅到都想死, 仲要張我地兩個夾係中間, 食到10點幾就各自返屋企啦

剝佢光豬

今日家姐回門攞燒豬返屋企食飯, 所以我就一早11點幾起身去旺角搵Pong食完飯賣埋沖涼液就返屋企同兩隻大小魔怪沖涼剷毛, 點知兩點鐘返到去, 阿媽已經同佢地沖好涼啦, 咁我就同佢地剷毛啦

我無偷懶

昨晚我好準時放工, 之後出旺角搵Pong佢係火車站等我, 因為佢要去奇華度攞月餅, 之後去左麥當當, 因為下午食完月餅頂住個胃所以我只係食左幾條薯條, 之後就去做gym啦, 梗係去玩body combat啦, 嘩!!!好似好耐無去咁呀

7點50分開始, 8點50分玩完, 之後就去沖涼啦, 因為我要趕返屋企睇歲月風雲, 睇完歲月梗係接住睇"味"啦, 我覺得田雞同谷德召好好笑

生果籃

臨近中秋,公司已經收左8個生果籃啦,有4個會計姐姐轉送左比其他公司,尼幾日下午3點幾都係食生果,昨日我地開左個超大嘅月餅一齊食,鐘意食月餅嘅我食左三小舊,死啦頂住個胃添,好辛苦,之後我決定今年中秋唔食月餅啦,以家仲有好多生果係雪櫃呀,都唔知幾時先食得完,唔知仲有無公司送生果籃呢？？

鐵板燒

2007年9月19星期三放工又無去做gym啦,Pong話返工比人搞到心情唔好所以要食下野喎,我地就簡左女人街裡面有間叫龜井嘅鐵板燒,其實我係第二次去食,因為我覺得食鐵板燒好鬼貴。

20070918

7點鐘放工, 都係無去做gym, 返到屋企8點幾先食得飯, 食完飯又係例牌去apm, 行到去滿記Pong問我飲唔飯糖水, 我梗係話好, 就叫左個白咩咩咩紫米露, 佢就叫左杏仁茶加紫米露, 真係好食完之後就行左去吉之島掃貨啦, 執下執下又執左$2xx, 仲買左好大盒嘅士多啤梨添, 返到屋企仲可以睇歲月風雲, 睇埋味分高下就去沖涼, 之後食左粒士多啤梨吹埋個頭就準備瞓覺囉

飲糖水

昨日Pong本來返左工, 但辛苦到要搭車返屋企, 所以夜晚無去做gym, 我就做到7點先放工, 返到屋企食完飯, 睇完歲月風雲就同Pong落樓下飲糖水, 佢飲左碗熱嘅杏仁茶, 我飲左碗凍嘅椰汁紫米露...飲完就去apm行左一陣就返到屋企, 沖完涼吹埋個頭, 12點就瞓覺囉
初初識Pong嘅時候成日12點幾落街飲糖水嘅...所以先搞到肥左好多, 不過都係之前個間好味d

20070916

由昨晚開始Pong已經病緊啦, 勁打丐嚏同流鼻水, 所以無去做gym瞓到12點先起身, 之後食佢媽媽煮嘅粥, 到3點幾落街搵中醫睇, 但d中醫都休息啦, 諗住睇西醫, 點知又無帶醫療咭, 張醫療咭係佢公司比佢架, 睇醫生唔洗錢架, 所以就返屋企攞囉, 返到屋企記得佢上次睇中醫張藥方仲係度, 所以就去執藥囉, 執完藥返到屋企叫左佢媽媽煲藥, 到5點幾就飲得, 之後佢又走左去瞓覺, 6點半我叫佢起身問佢同唔同我返屋企食飯, 因為前晚媽媽打比我嘅, 到最尾我都係叫佢唔好去啦, 死下死下咁, 我就自己出左門口啦

斷背

昨晚Pong放左工去左深水步買usb手指比我, 因為我昨日同佢食lunch時講過可以方便我係公司攞野返屋企做, 7點幾Pong返到黎, 買左支2G嘅比我仲係推蓋嘅, 之後仲話我知佢買左迫上斷背山添, 仲係零晨12點呀...

圓滿結束

四點去到酒樓, 化妝姐姐一早就等梗我地, 入到新娘房個個姊妹都即刻除晒鞋, 因為實在太痛同太攰啦

 家姐化完妝Set好頭, 之後就到我啦, 我化完就到兩位媽媽, 唉!!兩位媽媽雖然早到, 但一黎到就打麻雀, 連衫都未換, 真係激死, 之後我地就出去, d親戚都開始到啦, 著完褂就換婚紗, 係換褂之前我張條鍊比左家姐囉, 不過無帶, 要換婚紗啦, MC叫家姐換晚裝, 但家姐想著婚紗影多d相, 件婚紗左幾靚嘅, 因為係好長嘅拖尾, 有條額鍊, 好似公主咁, 真係好靚

差唔到八點關晒燈, 睇以前嘅相, 嘻嘻....有我同家姐影嘅相呀, 好細好細個, 之後就慢慢行入黎上台, 到兩個証婚人, 即我爸同佢爸啦...簽完名錫完咀咀, 就開始食野囉d野雖然好食, 但個件唔知咩令到我實在太辛苦, 所以食左好少野, 食完第二道菜家姐又要換啦, 換左件晚裝, 我梗係第一時間要去影相啦, 敬酒啦, 我係後面攞裙尾, 敬埋酒, 佢地兩公婆梗係周圍同人飲啦, 差唔到11點先企係外面送客

送完客我同另一個姊妹執野, 12點幾先搭地鐵走囉...返到屋企成一點幾啦 

男家記

係車上面伴郎好忙咁打電話, 要等齊車, 因為攝影師要影我地五駕車, 好似大約2點去到男家屋企啦, 超細有d兄弟姊妹要係酒樓食住野先, 留低我同伴郎同兩個姊妹幫手攞茶, 拜完神又到飲茶時間同埋攞禮物啦, 搞完一大輪野, 就開飯啦, 其實我一d都食唔落, 但佢屋企人比左好大碗飯我, 唔食又唔知點喎, 食完飯就坐係仲睇左家姐嘅婚紗相添, 影到我家姐好肥呀, 不過d景真係好靚, 越坐就越眼瞓, 最慘set左個頭, 如果唔係我一定瞓下先, 到4點叫返d兄弟上黎執野出發茶樓啦

出門記

昨日我7點鐘起身, 去左搵家姐, 我攤係張床度等家姐比人化完妝之後先去換衫, 嘻嘻...個化妝師話我似十幾歲呀, 我地有8個兄弟姊妹, 原本11點個新郎應該上到黎, 但拖下拖下到11點半先到, 擺明就拖時間啦, 不過都仲玩到3個遊戲, 第一個遊戲都幾三級架, 我地個個姊妹都笑到碌地, 玩完遊戲梗係接我家姐啦, 我爸爸帶佢行出黎個一刻感動到流淚呀, 搞到我都想喊添, 之後梗係比茶爸爸媽媽飲啦, 仲有攞禮物啦, 搞掂好晒就出門啦, 我梗係攞住紅色傘啦, 其他姊妹就掉米, 落到樓下勁多人望呀, 之後等齊車就出發去男家囉

時間

我發覺近日嘅時間過得越黎越快, 第一話咁快我姐姐嘅大日子明天就到啦, 第二每日好快就到Lunch time同埋放工, 每日嘅工作時間都好似唔夠咁, 昨晚我仲O.T.左半個鐘添, 半個鐘對一個平時準時嘅人黎話已經好多啦

健身 20

好似上個月上完健身堂之後教練一直都無問我地幾時上埋最後一堂, 頭先佢打比我問我, 我話過兩日先答佢, 其實我同Pong都唔係好想上, 因為怕佢又sell我地, 所以最後果堂決定豪比佢, 費事煩呀

唔do

今日8點半先起身, 所以要搭地鐵轉火車返工, 返到公司好彩都係9點05分啫, 我地過左15分鐘先扣錢嘅, 15分之後仲未見個女仔返工, 我就打比A/C啦, 佢地都無接過佢電話. 大約30分鐘A/C打比我話個女仔打返黎話辭職, 我心當好呀, 唔洗左住個地球轉呀

200700909

今日10點幾起身, 之後出旺角大快活食早餐, 食完就去做gym, 去打bodycombat, 玩完一點沖埋涼差唔多兩點, 行左一陣旺角之後就去食野, 跟住就返屋企啦, 係屋企無聊到6點半同Pong & 佢媽媽去周生生度買金, 買比我家姐, 嘻嘻...其實咁大個女我係第一次送禮物比佢架 (講出黎真係有d羞愧), 尼兩日金價升得好犀利, 好彩佢媽媽識人係金鋪做, 平左d手功囉, 佢係一條鐲形嘅鍊黎嘅...都ok啦, 唔太老土嘅

嚇到鼻哥窿都無肉

今日短週唔洗返工, 12點幾起身去旺角搵Pong, 之後就一個人去做gym, 行樓梯機行左45分鐘就沖涼走人啦, 上到更衣室見阿媽打黎, 所以覆返個電話比佢, 佢話東東流血, 之後我就沖完涼就搭車返青衣, 返到屋企又見到東東瞓係度唔郁喎, 所以即刻行去摸下佢, 睇下邊樹流啦, 結果我睇黎睇去都無血跡, 唉!!!原來係阿婆滴左d餸汁係地下而且d餸汁係茄汁黎, 嘩!!!!我仲一路搭車一路幾鬼死咁驚呀.......真係比個阿媽嚇死啦, 之後見佢無事我就同佢兩隻怪物剪下指甲, 到5點半就走啦, 出左旺角搵Pong, 仲係金魚街買左包魚仔返屋企比龜龜食添

20070907

今日女仔雖然無返, 但都無影響我d咩, 有野就做, 無野做就睇下blog, 下晝我請左假, 因為約左家姐四點試伴娘裙, 1點半走人, 出左旺角搵Pong食lunch, 食完搭車返到屋企差唔多三點啦, 之後睇左半個鐘換換愛就出去啦, 行左出門口先記得唔記得帶鞋, 搞到又要行返轉頭, 去到竟然四點半, 又遲到添, 唔洗好耐就走得啦, 出左旺角等Pong, 我一個人行新天地同旺角中心, 我係旺角中心二樓竟然比我見到件窿窿衫可以係家姐結婚那天朝早著, 所以等Pong放工帶佢黎睇下, 如果佢覺得ok我就買, 結果佢都覺得ok喎, 成為$80

又請假

今日我9點05分返到公司，唉！個新女仔又無返工啦，星期一開始返工直到以家請左三日假，之後會計姐姐打比我話，個女仔今日屋企人入左醫院喎，吓！究竟佢有無心做架？無心做就出聲啦，搞到我想比野佢做都唔夠膽，費事教完佢之後又話唔做，浪費晒我一片苦心呀。
個女仔係之前見果d大少少，所以個G.M覺得大少少應該定性d，但以家......唉！！

20070906

一到6點即閃, 因為Pong約左同事一齊返大陸食飯, 好開心呀

Sick Leave

今日係星期二, 我孤軍作戰已經係第二日啦, 好彩暫時都無咩大問題啫, 星期一時有個女仔返工, 但今日9點幾都仲未見人, 所以會計小姐就打比佢, 佢話病左要S.L., 明天會返工, 不過我都係預佢唔返好d, 但係我梗係想佢返啦, 可以做少d野架



我d同事就係度講笑, 話我梗係比太多野佢做, 嚇親人啦

20070902

今日雖然係放假, 但係我地都一早起身

20070831

今日係小姐嘅last day, 所以lunch成班同事連經理, 老闆都一齊去飲茶, 唔洗講梗係有大食大啦, 到3點幾有人請飲野, 小姐亦都攞左3盒西餅, 之後幾個女仔影左幾張相, 話咁快就6點啦, 我梗係準時放工啦