20070407

對好多人黎講今日係假期，但對我黎講今日係要返工，我真是一隻可憐豬啦，不過都無咩做得個坐字同上下網，其實成日對住個電腦真係幾辛苦架。下午2點半〈我地個食飯時間係12-01架〉Manager飲完茶返來我仲以為佢會走，因為今日無馬跑，通常無馬跑嘅日子佢食完飯返來就會攞包包走人，但今日無嘅？？

我仲諗住3點鐘佢走左之後我就走去個gym添，早D做完等兩個鐘就可以食野，可以好D嘛！結果佢4點幾先走，真係有D唔開心添。4點半我都走啦，約埋Pong係旺角等，首先跑15分鐘先之後去做器械，我見到教練行黎行去，最終佢見到我，行左過黎傾左幾句教左我幾下佢就閃左啦，佢走左之後我行過Pong度，佢竟然話我比人聊喎，吓！我教練黎架喎。最有緣嘅都係係無約嘅情況之下見到佢個FD喎，太約7點半就去沖涼啦，今次沖完涼我要焗桑拿，因為去左兩次兩次都好鬼遲唔想Pong等咁耐所以唔焗，但今次就可以啦。

首先我去左乾蒸，一開門見到有兩個肥師奶已經霸佔左D位啦，因為有個肥師奶成條毛巾拿開瞓左係張Chair度同另一個肥師奶吹水，所以我只好去濕蒸度，我都唔知自己焗左幾耐，焗完之後成塊面都紅鬼晒。係旺角行左1個鐘到，因為佢媽媽已經煮好飯，怕一返到去就忍唔住立即食飯，所以就行街拖下時間先。

我地行左去Bossini度行，係最上層係家居野買，佢嘅床上用品同毛巾都好靚，望落好似好舒服咁。行到8點45分搭車返屋企啦，我只係食左半碗飯，岩岩好又唔太飽又唔太餓，之後就坐定定睇大話妹啦。