返娘家

前幾日媽媽叫我同家姐星期五晚返屋企食飯，我好乖咁應承左，所以昨晚放工就同Pong去左葵芳，打比媽媽諗住問下佢幾點食飯，佢一聽電話又聽到麻雀聲嘅，慘啦!!原來唔只係屋企人食飯咁簡單，早知就打死都唔返啦。
可能我太耐無去葵芳，最頂個層多左咁多野食都唔知喎，我地就買左10蚊燒賣同10蚊魚蛋，太耐無食啦，食得咁瘋狂嘅，真係開心。

食完之後行左兩個圈就坐小巴返屋企，未開門就聽到MOMO係咁吠，跟住再聽到東東嘅噹噹聲，東東老啦佢轉圈都無以前轉得咁快，因為佢以前知到有客人時佢會成屋跑一個圈之後就後就係你面前係咁轉，真係睇到你暈暈地，不過佢淨係識同一個方向轉咋，之後我梗係同佢玩下啦，跟住我就捉住東東同MOMO剪腳甲。

Pong係公司D/L左套日劇所以就係我屋企開黎睇啦，無幾耐就食得啦，嘩!!洗唔洗咁多餸呀??有我最愛嘅蕃茄薯仔湯，不過我飲左三碗湯之後就飽啦。

Pong亦都係食左少少就飽啦，佢又繼續睇佢嘅日劇，我都唔明我D親戚講野咁大聲又噪都可以睇得咁入神嘅，我爸爸同我講話想要部MP3機喎，又唔知佢見到邊個用所以又想買啦，不過我都會買比佢，其實我咁大個女送比佢嘅野真係五隻手指數得晒....真係有D羞愧。

大約11點就坐車返屋企lu，返到屋企先覺得有少少餓，所以開左上次係Muji買嘅零食食，食完就去洗白白啦