講開就嬲嬲地

前日就講佢弟弟買樓d野,講開佢弟弟真係嬲嬲地

屋企嘅日用品食物用完食完,寧願唔用唔食佢都唔會去補給,家用又無比以前就話part time讀大學唔比啫,以家書又讀完都唔比,佢阿媽都暗示過幾次都無反應,有時出糧我同Pong會去超市掃貨,有時買左d佢又岩飲岩食嘅野,我一包都未飲過未食過就唔見左啦,所以以家我都淨係買返我地自己嘅野,有時都會氹下佢阿媽買d比佢食,不過以前係舊屋佢爸媽有時都會返大陸,佢弟弟會同佢女朋友去吉之島掃貨架,不過係掃一日嘅食糧,多都無架

星期六個日我短週,Pong係屯門返工,lunch我同伯母去搵佢飲茶,伯母話比我地聽,世伯都好唔鐘意佢弟弟咁大隻講,因為係舊屋個時比人爆格所以世伯伯母比人偷晒d錶,有一年生日佢弟弟就同世伯講話生日禮物買隻錶送比佢,結果講完之後提都無提過,另外佢地大陸仲有層樓,以家仲供緊,佢弟弟又話如果你地供唔到我都可以幫手供架,之後又係講左就算,兩年前世伯生日前佢媽媽暗示話世伯個銀包爛左,咁就佢兩兄弟夾錢,有日放工,我就陪Pong係agnesb度買左返去,之後佢弟弟提都無提過

不過佢外表好似好姑寒,但佢對自己一d都唔姑寒架,因為千幾蚊嘅玩具佢都會買架

我都唔明,世伯伯母同Pong都唔係d咁嘅人,可以話係講得出做得到,點解佢弟弟會咁另類呢???

仲有講漏左樣野,佢自己養左三隻龍貓,初初我見佢都會買糧,每日畏佢地食野換野,定時同佢地沖涼,以家只係有時摸下佢地咋,連龍貓糧都係伯母買咋,可能伯母買三次佢就會買一次囉,我記得未搬個時,伯母買左隻沖涼粉比佢地,之後佢弟弟用黎幫佢地沖,佢又話隻粉粗唔夠細粒又話見到佢地入眼好唔舒服,超...咁佢自己又唔買